Shopping

Deur Evette Lombard©

Mei 1999

Nog ʼn ontdekking was die Sweedse Wonderwêreld van Ontwerp by IKEA.  Ek het nog nie woorde om dit te beskryf nie.  Dit is eenvoudig, dit werk, dit is ʼn plesier om na te kyk.  Die hele winkel is propvol meubels en kaste, beddens, kombuise en elke ding om die lewe in ʼn klein gaatjie makliker leefbaar te maak.  Laaikassies, houers, karton boksies enige ding om jou lewe te orden. Klaargemaakte fotorame, kinderspeelgoed, kombuisgoed, tuingoed, die werke.

Vögele is skoene wêreld. Elke kleur en geur wat bestaan is daar - soos Extra Shoes in die Kaap, met die verskil, hulle is almal italiaanse leer skoene.  Nou ja toe!

Bennet is ʼn supermark soos die Hyperama, met ʼn verskil: delikatessen kwaliteit in supermark kwantiteit en met Hyperama pryse.

Ek soek vir ons bloedrooi kersies uit en ʼn sakkie gedroogde, wilde sampioene en ʼn padano gradano wat ʼn stokou parmesaan kaas is.  Terwyl ek lekker ryp tamaties uitsoek vir Ma se ratatouille voel ek aan dat die twee dames wat saam met my tamaties uitsoek, weet wat hulle doen.  Hulle het ʼn oog: donker rooi kleur en ʼn neus: soet, ryp reuk en ʼn gevoel: sag maar nie pap nie, skilletjie nie gefrummel nie, vir die regte tamatie, wat seker vanaand in een of ander asemrowende sousie gaan verander.  Hulle grawe die tamaties onder die tamaties uit met die geesdrif  van ʼn ras egte varkie wat ʼn truffle uitruik.

Daar is ʼn hele ry van verskillende olyfolies, selfde met die pasta. ʼn Hele ry, dit wil sê nie ʼn hele rak nie, ʼn hele ry, dit wil sê vier rakke aan albei kante van die ry, ʼn ry lank.