Provence

Deur Evette Lombard©

Mei 1999

Na Nice vat ons die pad na Vence.  Dit is die dorpie waar Matisse kort voor die einde van sy lewe, ʼn katedraaltjie ontwerp en die interieur daarvoor gedoen het.  Twee mure aan die binnekant het gebrandskilderde glas, in geel, blou en groen - wat die idee van orrelpype gee en die ander drie mure het olieverf sketse in swart op wit teëls.  Een van Madonna en kind, een van Jesus se kruisiging en een van die pous.  Hy het ook die priesters se klerasie ontwerp, in die helderste kleure denkbaar: pienk en geel, rooi en groen, blou en wit - dit lyk meer soos ZCC togas gemeng met Riksja drywers.  Dit was tog fassinerend om die vryheid te sien waarmee die man te werk gegaan het, hy het alle konvensies ore aan gesit met daai werk!

Daarna doen ons St. Paul du Vence wat ʼn prentjie mooi plekkie is met duisende pikante winkeltjies, een waar jy olyfolie proe - olie uit Portugal, Israel, Spanje, elke plek wat olyf olie vervaardig het ʼn verteenwoordiger, behalwe natuurlik ons blokkie land aan die eindpunt van Afrika.  Dis oulik want die dorpie is eintlik ʼn museum maar in plaas daarvan dat die ou huisies leeg staan is hulle winkeltjies, elkeen met iets anders te koop.  Daar is so min ruimte tussen die geboutjies om tuin te maak maar in elke kolletjie grond groei ʼn wynstok of ʼn rankroos.  Elke potplant het veelkleurige lenteblommetjies of natuurlik blou irisse in.  Die potte kan so voor die voordeurtjies staan, jaar in jaar uit, sonder dat enige vandaliste dit breek, omgooi of uitgooi, om nie eers van steel te praat nie.  My hart bloei vir ons land soos ek stap.

Na kort stop in die dorpies is ons na die Luberon (Provence).  Tussen Menerbes en Bonnieux is die landskap en die plaashuise op hulle mooiste en ons begin soek vir ʼn slaapplek.  Dit is lekker om te weet dat die Here reeds ons kamers bespreek het en dat ons weet ons is nou oppad soontoe.  Ons ry verby een wat se naam is Les Pereilles en al wat jy van die paadjie af sien is 2 deck chairs op die stoepie.  Gaan kyk eers na die een by die plaas langsaan maar vir een of ander rede, roep die een met die gesellige stoepie ons terug. 

Muriel is ons gasvrou, ʼn fyn blonde vroutjie met ʼn kleutertjie wat haar orals volg.  Mary had a little lamb.  Muriel  is swanger, ten minste ses maande.  Sy het vir die drie dae wat ons daar was, dieselfde swart rokkie van rekstof aangehad, totaal ongekunsteld.  Daarin lê die skoonheid van die hele  Provence.  Ek is verjeug toe ek in die laventel kamertjie instap, na vier aande van slaap op die mat, tussen die venster en die bed in Nice.  Dit is hoe ons dit doen.  Spaar hier, spandeer daar.  Ma en Pa trek in die rooi kersie kamer in.  Ons gaan onmiddelik vir ʼn wandeling op die plaaspaadjies.  Ek pluk ʼn bossie gekleurde veldblommetjies:  ʼn blou iris, rooi poppie, fyn pienk blommetjies, ʼn kantblom, ʼn koringaar,  pers salies en geel besembos.  Dit ruik soos my Nice parfuum.  Mamma pluk ʼn bossie poppies en dit lyk soos ʼn prentjie teen haar swart hempie.  Terug by die huis, spring ons al drie eers in die swembad en trek toe aan vir aand ete.  Clementine is ʼn restaurant in Menerbes, gebou aan die rand van die dorpie en kyk uit oor die vallei.  Ons sit binne by ʼn pienk tafeltjie met ʼn pienk glas vaas uit die sewentigs wat so ʼn swierige draai maak, vol lap blommetjies. Teen die muur is ʼn batik van ʼn voëltjie.  Ek verbeel my dis ʼn alouette. Weetnie hoe ʼn alouette lyk nie, weet net hoe die liedjie klink.  Bruinoog ‘garson’ swart broekie, wit hemp kom neem ons bestelling en ons vra hom uit oor die geregte.  Met my kennis van Frans, Pa se Italiaans, Ma se cordon bleu kursusse en ons almal se moedertong, verstaan ons hom heel goed.

Gelée de Museau at sa vinaigrette

Vark kop in ʼn jellie van groente en groen peper korrels, met olyfolie en suurlemoen sousie.        As jou verstand jou pla, gooi hom by die vester uit.  Proe met jou mond Evette, dis heerlik!

Baron d’agneau grille à sariette

Lamtjoppie gebraai in ʼn sariette sousie.  Ons konnie uitvind watter tipe krui die sariette is nie, baie populêr maar groot geheim!

Fromage de chèvre à l’huile d’olive

Bok melk kasie in olyfolie.

Die kasie is geurig dog smaakloos as jy verstaan wat ek bedoel, verskaf die funksie van ʼn palette cleanser.

Gateau au Chocolat

Sjokolade koek.

Wolkie, somerbriesie, reënboog, doudruppels.

Sonder dat ons dit geweet het, het Provence al lankal met ons begin toor!   Pa neem ʼn foto van my en Ma onder die neon letters van Clementine se flikker kersfees liggies.  Snaaks, ons is nie kruppel geëet soos ʼn mens sou verwag van so ʼn ete nie.  As jy kyk na die oënskynlike ryk kosse sal mens dit nie kan sê nie.  Dalk is dit die skoon lug.