Die Swaan

Deur Evette Lombard©

Mei 1999

Sit nog steeds op haar eiers en daar is ‘n ander trotse moeder wat rondswem met 4 donsie swaan babatjies.  Die dag na ek hierdie stelling gemaak het, besef ons die moeder het vir n paar dae nog op die nes gesit en rus en dat dit al die tyd vader Swaan is wat met die kleinspan op die meer rondswem.  Lelike eendjies is hulle miskien maar die mooiste baba swaantjies wat ek nog gesien het!

Die volgende dag is daar net 3 kleintjies en ons begin wonder of dit nie die strandkat - streepkat met die woeste snorbaarde se werk is nie.

Ons hou die swane dop.  Die wyfie sit met die kleintjies in die nes en pa kom uit die water en staan homself en groom op die strandjie.  Vere droogmaak en uitkam met sy oranje bek, strek en rek. Volgende dag sien ons weer al vier, skuus kietsie.  Die oudste een het seker gisteraand by die bure gaan slaap. Hy is hoeka so n rammetjie uitnek!

Teen sononder is die familie weer aan die titteweit en die donsies se nekkies word al hoe langer en die veertjies al hoe witter.  So gaan loer ons elke aand na ete, half nege begin dit donker word, na hulle vordering.

Asof mens teater toe gaan vir vanaand se aflewering van Swanlake!

Na daardie slanke voël haarself getof het en met haar vlerke uitgestrek op haar rug die water in seil besef jy opnuut die waarde van die Swanemeer en

dat swane inderdaad, tuttus dra!